Münâcât / Muallim Naci (Sünbüle)
Münâcât
İlâhî cihân-âferîn zü’l-celâlim
Şuhûd-i rubûbiyyetinde avâlim
Temâsîl-i erteng-i pür-hikmetindir
Kerîm ü kerem-dîde, mazlum ü zâlim
Huzurunda mahsûl-i kalb ü lisânım
Hurûşân-sirişkim, perîşân-mekâlim
Ne hacet var izhâr-ı acz ü niyâza
Bütün ihtikarım, bütün ibtihâlim
Muammâ-yı dil bir garîb âferîde
Ne mecnûn ne âkil -ne câhil ne âlim
Bilen varsa sensin nasıl nüshayım ben
Bana verdi hayret gumûz-i meâlim
Nasıl i’timâd eyleyim mâ-sivâya
Ki her bir demimdir dem-i intikâlim
Bekâ yoksa dünyâda ukbâda vardır
Benim var mı yoktur demek ihtimâlim
Eder rûh-i Nâcî şu ikrarı tekrâr
Masûnü’z-zevâtim, masûnü’z-zevâiim
Senin lûtf-i vâlânı gözler ümîdim
Senin kurb-i â’lânı özler hayâlim
Şu hâlim olur belki gufrânı câlib
Olur belki gufranı câlib şu hâlim
Muallim Naci (Sünbüle)
FACEBOOK YORUMLAR